الجيب والقرناس وخوة هل الطيب
تسوى قعدة عرب في المدينـه
ماسبّهم واعرف انا مابهـم عيـب
بس الهوى ياهل الهوى حـد لينـه
عزبه وخيمه والصحاري مضاريب
وأبو ثلاث شهور صالخينـه
ومعلقينه من كراعه على الجيـب
والبـن الاشقـر تونـا حامسينـه
شبّت حطب ماهي بشبة عياسيـب
ارطـا وعرفـج يمنّـا حاطبينـه
واليا سنت شب الجروم اللواهيـب
قام المقهوي قّـرب المـاء بدينـه
ركّـب دلال مجلـدات المقاظيـب
رسلان من سـوق الحفـر جالبينـه
صفر ٍ تـلالا يطعمـن المشاريـب
تبعد عن انفـوس العبـاد الغبينـه
واليا احتمى ماهن يشيل المراكيب
يحـط كيفـن بالنجـر طاحنيـنـه
فنجال ونص وردهن يمـه قريـب
وجاب البريج وسكره فـي بطينـه
وحطه على صفه هذيك المهاذيـب
والبن فـاح وركـده فـي سكينـه
وجاب الدلال الي يعرف المواجيب
ثنتين غيـر الـي بهـن عاملينـه
مجنون كيف ورتب الامر ترتيـب
حـط البهار وريـح هيلـه يازينـه
ثم زلهن لين استوى باخر السيـب
وحطـه بنـاره ربنـا لاتهيـنـه
وقال اقدعوا تمر حلو توّه امجيـب
اخلاص من دار الحسا محضرينه
ثم صب فنجاله ومابـه عذاريـب
والله على الفنجـال تسلـم يمينـه
مجربن ماهوب يحتـاج تجريـب
اي والله انـا كلـنـا مجربيـنـه
مافيه ظيف وكل ابونـا معازيـب
والشاي خدر والـورق حاكرينـه
وعقب السوالف والقهاوي مطاليب
كـل يناظـر للمـواتـر بعيـنـه
نبي نهيّف فـوق روس المراقيـب
وانفّرع القرناس لاجـل السمينـه
اليا خطفهـا خطفتـن بالمخاليـب
تبري النفوس الضيقـات الحزينـه
واليا انتهى المقناص جبنا مكاسيب
والحر الاشقـر عقبهـا مبرقعينـه
ونمشي ونلقى يمّنـا فطـر شيـب
ومفرود يطرد من ورى امه تنينـه
وسط النفود ولانمـر الشخانيـب
نخاف من ضرب الحصى فالمكينه
ووساع صدر ونطقنا بالتراحيـب
واعقولنا هـي العقـول الرزينـه
ياليت لي دورن بغـوج الاطانيـب
وانسى حضارات الخراب وسنينه
اخير من طرد البنـات الرعابيـب
واحدن تسمّع مـن عذابـه ونينـه
ممشاي صح وخوتـي للاشانيـب
رجل يصد اعن المراجل ياشينـه
|
 |
رد مع اقتباس
