بودنج الخبز .. من المطبخ البريطاني
المقادير
كوبين ونص حليب
كوبين ونص كريمة
عود قرفة
ملعقة صغيرة جوزة طيب
١٥ حبة قرنفل
١٥ حبة فلفل أسود
ملعقة صغيرة قشر برتقال مجفف
تقريبا 15 جرام زنجبيل مسكر ياجاهز يا تسوونه في البيت. مقطع صغار
3 بيضات
3 صفارات بيض
1/2 كوب سكر
3/4 كوب سكر بني غامق
ملعقة كبيرة فانيلا سايلة
تقريبا 10 – 12 كوب خبز خميرة قديم من أي نوع مقطع مكعبات.
كوب إضافات حسب الرغبة (إختياري).
* الخبز ممكن يكون أي خبز أهم شي يكون خبز قديم
وكل ماكان قديم أحسن. لو ماعندكم خبز قديم حطوا الخبز
في فرن بارد ( يعني حرارته على أقل شي )
وخلوا الخبز ينشف فيه.
أي نوع خبز بشرط يكون خبز خميرة ممكن يستخدم يمديكم
حتى تستخدمون كروسان أو بريوش لو تبون
وبيعطيكم طعم رهيب.
* المقصود بالإضافات يعني مكسرات أو فواكه مجففة
أو طازة ( الموز بالذات رهيب ) أو حتى هيرشي أو أي شي ثاني.
أنا أستخدمت هنا موز مستوي مررره مع جوز
( خليط دايما رهيب ) بس حطوا اللي يعجبكم.
الطريقة
نخلط نص الحليب مع نص الكريمة في قدر ونضيف عليهم القرفة
و القرنفل و الفلفل الأسود و قشر البرتقال و الزنجبيل
و جوزة الطيب ونخليهم إلين يوصلون غليه جدا هادية
بعدين نطفي النار ونغطي القدر ونخليه يتطعم ربع ساعة.
نصفي الخليط ونحطه عالجنب.
الحين في صحن خلط كبير نخفق البيض مع صفار البيض
و السكر الأبيض و البني مع رشة ملح إلين يصير الخليط
متجانس ومنفوش شوي بعدين نخلط عليه الفانيلا
و الكريمة و الحليب اللي طعمنا و باقي الحليب و الكريمة.
هذا الكسترد اللي بنصبه عالخبز
إذا تبون أحسن نتيجة سووا الكسترد هذا قبل بيوم أو يومين
وحطوه في الثلاجه، الكسترد يتحسن دايما في الثلاجه.
الحين رصوا الخبز الناشف و الإضافات إذا بتحطون
في الصحن اللي بتستخدمون بعدين صبوا الكسترد عليه.
غطوا الخليط بنايلون وخلوه يتشربه ساعتين تقريبا
على حرارة الغرفة أو ٨ ساعات في الثلاجة.
شغلوا الفرن على ٣٢٥ .
دخلوا البودنج الفرن إلين ينفش شوي ويجمد الكسترد تقريبا
ساعة إلا ربع ( الوقت اللي حاط للصحون حقتي الوقت
راح يختلف كثير مع كل حجم وشكل صحن ).
أو اللي عندهم ميزان حرارة إلين توصل حرارته الداخلية ١٦٥
– ١٧٠ فهرنهايت. طلعوه من الفرن
وكلوه بعد ما يبرد شوي أو خلوه يبرد لحرارة الغرفة
أو حتى كلوه بارد من الثلاجه.
قدموا مع البودنج صوص كاراميل أو دولتشي دي ليتشي
أو حتى بترسكوتش لو تبون بس هو لحالة رهيب.
|
 |
رد مع اقتباس
المشاركة الأصلية كتبت بواسطة قلب الوفا
~
