ألا يالله اني طالبك طاعتك ورضاك
وعلم ليا ذكروا هل الخير نذكر به

انا في رجا عفوك وانا ملتجي بحماك
تفرج هموم القلب يافارج الكربة

إذا ذعذع الغربي وحرك غصون الراك
وناح الحمام وعالي الصوت يجهر به

تنهدت مثل المضرم اللي لقا التنباك
تنهد صويب مونس لكزة الحربة

اجاوب حمام الورق يا لايمي عساك
يحدك زمانك يم من لاتبي قربه

خجول ليا جيته ذليل تعد خطاك
تلزا وقلبك واهج النار يسعر به

الا ياحمام الورق ماشفت وإلا جاك
ترى ينفع المهموم علم يبشر به

عن الدار وأهل الدار والسر مايخفاك
غريب تحداه الزمان وقلع سربه

من أول يجوز العذر للي يروح هناك
وانا اليوم مالي عذر ويش آتعذر به

مسكها حكيم الراي وأندارت الأفلاك
وقاد السفينه وأشرق النور مع دربه