فتحي حلواني :
اتوضيت وجيت ابغى اخرج عشان الحق صلاة العصر إلا واسمع صوت ام فتو تقول لا تنسى المقاضي اللي قولتلك تجيبها معاك مش انت تبغى العازات كل يوم بيومه ولا تنسى كمان وانت راجع تجيب معاك عمدة السفرة.. طيب حاضر تبغي شي تاني.. لا سلامتك... وول وول الصلاة حتخلص وهادي لسانها ما شاء الله ولا ويوقف.. المهم اشتريت العازات اللي قالتلي ام فتو عليها واذكرت اني نسيت العمدة اخدت بعضي ورحت على الفوال والا واشوفلك هاتيك الزحمة من البشر عالم يا كترها واقفة عند الفوال وسيارات واقفة على الشارع ومعطلة الحركة وجات عيني على الساعة كان باقي نص ساعة على المغرب.. ودخلت في معمعة زحمة الزبائن اللي يقول بريالين فول سادة واللي يقول بتلاتة ريال فول والسلطة براني واللي يبغى فول من غير طحينة هادا غير الزحمة اللي عند فرن التميز اللي يبغى بالسمن واللي يبغى طايفي واللي يبغى بسكوت وسمعت واحد ورايا يقول للفران جهز واحد ملبلب على بال ما آخد الفول قلت في نفسي الله يرحم ايام الملبلب واشوف العالم كل ما لها تزيد عند الفوال واسمع اصوات الزبائن تزيد.
يا ابويا مشينا المغرب حيأدن.. يا ابويا انا الاول.. يا ابويا انا قبله وما تسمع الا اصوات الزبادي تتصاقع مع بعض، وشويه اشوف اتنين دخلوا في بعض واحد يقول للتاني انا جيت قبلك رد عليه وقال له انت جاي من بره ما كنت ماسك سرا.. وكلمة من هنا وكلمة من هنا وقعدوا يسبوا في بعض والعالم ترد عليهم يا هوه ما يصير كده رمضان كريم لا تجرحوا صيامكم.. واتشابكوا مع بعض وعيونك ما تشوف الا النور وفين يوجعك وما تشوف الا هدود وركب وابكاس وقعدت العالم تفارع بينهم ودخلت انا معاهم يا هوه ما يصير كده روقوا المنقا وقعدت افارع بينهم ويا ريتني ما اتلقفت لأنه والغشنة شغالة جاني بكس خلاني اشوف سفرة الفطور قبل ما تنحط.
المهم انتهت الغشنة واخدت زبدية الفول وجيت راجع على البيت واول ما شافتني ام فتو قالتلي ايشبك اتأخرت وايشبها العمامة مشعترة وحنكك معووج.
الله يسامحك يا ام فتو هادا كله من العمدة حقك جنن العالم في رمضان وخلاهم بلا مخ.. يا هوه يا عالم اشتروا الفول من بدري عشان لا تجرحوا صيامكم ويجيكم اللي جاني ورمضان كريم.
|
 |
رد مع اقتباس
