مثل ماتعودنا وعرفنا وخبرنا إن البدو أول كان عندهم عادات غريبه وكل تصرف يكون له مغزى ومقصد ..
يعني مافيه شيء يسوونه الا يكون له غايه وهدف من هالتصرف ..
وكانت تحكمهم هالأمور ويتعبرونها شيء مقدس ياويل اللي يخل به أو يتهاون فيه ..
وعلى قولتهم الرجال بافعالها .. والرجال اللي مايكون قد هالعادات يحقرونه ولايعتبرونه رجال ..
صحيح إن الرجوله مازال ولله الحمد للحين لها مقاييسها وسماتها بس اهون بكثير من أول..
لانهم أول مثل ما قلت متشددين بكل شيء .. وكل شيء له قانونه ..
حتى فناجيل القهوه كانت لها مسميات وعادات من جد غريبه بس تعجبني ..
الفنجال الأول : (( الهيف ))
وهذا الفنجال اللي يشربه المعزب أو راعي البيت قبل لايمد قهوته على ضيوفه ..
وكان لابد منه عند العرب أول علشان الضيف يأمن ويتطمن لايكون بالقهوه شيء أو تكون مسمومه ..
لانهم أول كانوا يخافون وما كان فيه أمان زي اللحين ..
وجرت العاده حتى وقتنا هذا ولكن الهدف تغير يعني اللحين اللي يسوي القهوه أو المعزب يشرب أول فنجال قبل لايمد قهوته عشان يتأكد من جودتها .. وانها ماتكون صايده.. ويلحقه الحق قدام الرجال ويسخرون من قهوته ..
ومعنى كلمة صايده .. يعني يكون فيها طعم أو نكهه غريبه تخرب طعم القهوه والا تكون قهوته مهي موزونه ومضبوطه..
أو يكون اللي مسويها على نجاسه ..
وطبعا أول كانوا الناس يميزون القهوه الصايده من غيرها أما اللحين الله يخلف ماجاهم سفوه وبس مايعرفون لا صايده ولا غيره ..
الفنجال الثاني : (( الضيف ))
وهو الفنجـان الأول الذي يقدم للضيف وهو واجب الضيافـة..
وكان الضيف قديما في البادية مجـبر على شربه إلا في حالـة العداوة أوأن يكون للضيف طلب صعب وقوي عند المضيف ..
وقتها مايشربه إلا اذا اخذ وعد من المعزب انه يلبي له طلبه ..<<< ياكثر ماشفناها بالمسلسلات البدويه *_^
و كان من عظائم الأمـور أن يأتي إنسان إلى بيتك ولايشرب فنجالك إلا بعد تلبية طلبه.. كانوا يعتبرون حمل وهم مثل الدين .. وكانوا مجـبرين على التلبيـة وإلا لحق بهم العـار وسط القبايل ..
الفنجال الثالث : ((الكيف ))
وهالفنجال مايضر المعزب لو ما شربه ضيفه والضيف مهوب مجبر على شربه ..
لانه يعتبر مجرد تعديل كيف للضيف أن بغاه شربه وإن ما بغاه كف عنه ..
وهالفنجال يعتبر اقل الفناجيل قوه في سلوم العرب وما منه مضره على أحد..
الفنجال الرابع (( السيف ))
وهذا يعتبر الفنجال الثالث اللي يقدم للضيف بس العرب كلها تخاف منه وتحاشاه
وكان من أقوى فناجيل القهوه عند العرب .. لأن هالفنجال يعتبر مثل المعاهده ..
يعني لا شربته فاأنت مع هالمعزب على السراء والضراء ..وتكون مجبر تدافع عن المعزب بحد السيف ..
يعني تصير عونه لانتخاك باي وقت ..ويصير عدوه عدوك وصديقه صديقك حتى لو كان صديقه من اشد اعداءك ..
دامك شربت هالفنجال فاانت وهو شيء واحد ..
ولان هالفنجال كان يسبب الكثير من المشاكل والاحراجات كانوا العرب يتحاشونه ..
وما كان يتجاوز ثلاث فناجيل الا أهل المعزب واقاربه وانسابه ومعارفه من افراد قبيلته وذوي دمه ..
والفنجال الخامس:
هذا غير عن الفناجيل اللي قبل كلها هذا فنجال الطلابه أو النخوه ..
يعني أن من يطلب احد بدم والا ثأر ولا بينهم شيء سواء كان شيخ القبيله أو رجل كبير بالسن أو عجوز لها ثأر عند أحد ..
ماعليه إلا أنه يجي وسط فرسان القبيله وشبابها ويرفع هالفنجال ويقول هذا فنجال فلان ابن فلان من يشربه ؟
يعني من يأخذ حقنا وثأرنا منه ..
ومن يتقدم ويشرب هالفنجال من الفرسان يكون عليه اخذ الثأر من الشخص المطلوب ويروح من ديرته
وما يرجع لها الا ومعه شي يثبت للناس انه اخذ بثار اللي انتخاه ..
واذا ما نفذ هالشيء يجلي من الديره ولايرجع لها ابد لانه لحقه عار وماكان قد هالفنجال اللي شربه..
أو انه يرجع لهم بس يكون مكسور وماله كلمه والعالم ماتشوفه رجال ومايتزوج من بنات قبيلته وما يشارك معهم بغزواتهم ..
والله هالفنجال مسوي سواياه وله قدر بين العربان ..
<<< تقول اكيد الشباب اللحين يقولون الحمدلله ان هالعادات راحت والا كان بلشنا خخخخخخخخخخخ
بس تبون الصراحه على الرغم من صرامة هالعادات وقساوتها الا انها كانت تثبت الرجوله صح ..
وكان كل شيء له قيمه وقدر..
اتمنى يكون الموضوع عجبكم ..
|
 |
رد مع اقتباس
