خليكم معي واتخيلوا المنظر

دخلت مركز تجاري في أي مكان .. على باب المركز مجموعة شباب جالسين ما تدري ويش سالفتهم.. هل هو حياء منهم أن يدخلوا المركز ... ولا انهم تطوعوا للعمل عند صاحب المركز بوابين .. خير
دخلت المركز تطالع يمينك تلقى اربعة ولا خمسة شباب آخر كشخة ... وشمغ وغتر تقول إنهم على موعد مع مدير شؤون الموظفين بشركة ارامكو .. وعطر تشمه ولو كنت مزكوم من قوته .. واقفين واحد بيده قهوة بارنيز ... حتى لو كانت العلبه فاضيه ... ولا اي شي والباقين معاهم عصير وغالبا فراوله لزوم الدلع .. وهو الي ينظر لعلبة السن توب بكل الاحترام والتقدير .. وواقفين ينتظرون .. ويش ينتظرون .. طبعا صيده .. ولأننا لسنا في محمية للحياة الفطرية .. وهذا المكان لا تمر به الغزلان ... فيجب ان تكون الصيده من نوع آخر .. خير
تمشي شوي ... تناظر .. تلاقي مجموعة لابسين بنطلونات يستحي أي غربي محترم يلبسها .. وبلوزات اكيد الي صنعها لو بلغه إن فيه عرب يلبسونها أغمى عليه من الفرحه .. وكل واحد معاه جواله ... بلوتوث ولا نغمات وهات يا تحريك يمين وشمال .. ويش ينتظرون .. ارسال شركة الإتصالات .. لا ... طبعا صيده
اثنين شباب ماشيين لحالهم ... يا سلام على التسوق ... ومعاهم كيس مكتوب عليه شانيل .. وأقطع يدي إنه فاضي ... وشويه وقفوا قدام محل ملابس نسائيه يبتسمون .. منظر غريب .. أخيرا لقوا صيده

شوي إلا بنتين خارجات من محل ... يا عيني على الدلع .. اثنين كيلو بودره ماكس فاكتور .. ربع كيلوا روج .. عبايات مخصرة ... تقريبا مكتوب عليها .. قابله للغزل والترقيم .. وغطوه تبين أكثر مما تخفي و ما تدري هي على الوجه ولا هي تحت الوجه بس باين طرفها
منظر اصبح طبيعي جدا .. لكن الغير طبيعي والي يزعل يزعل .. إنه يجي واحد يقول .. بنات آخر زمن ما يستحون
كل الشباب الي مر وعدى عليهم طبيعي .. لكن بس هالبنتين غير طبيعي
يبغى ينصح .. راح للبنات وقال يا بنات استحوا على وجهكم عيب ما يصير
وترك عشرين شاب وراء ظهره يقدر يكلمهم بكل حرية ويتناقش معهم
اسمحوا لي .. طبيعي أن نجد فتاة ترفع عبايتها او تنزل طرحتها من بين كل مائة او الف فتاة
غير طبيعي إن هذه الفتاة يتبعها مائة شاب ما بين راكب وماشي او حتى ببصره وقلبه وهذا اضعف الغزل .
بنت ممكن تقلب شارع... وتتركه مقلوب ولا بنك الراجحي في يوم اكتتاب .. البنت غير محترمه ..اتفقنا .. طيب والشارع ؟؟؟؟؟
بنت وحده ممكن تفتن الف شاب .. صحيح البنات فتنه .. لكن ليه ما شاب واحد يفتن الف بنت .. اما البنت غير طبيعيه .. ولا الألف شاب عقولهم فارغة وقلوبهم ما عاد فيها حياء من الله
يجي واحد يحب يتفلسف .. يقول لو جلسوا البنات في بيوتهم ولا كانوا محترمين ما كان صار شي .. اقول له .. طيب يا ارسطو .. طيب يالفيلسوف ...
لو انت صائم ومريت قدام مطعم مفتوح . تدخل تأكل وتقول لو المطعم كان مغلق كنت تميت صيامي
لو سيارة فيراري .. ولا بلاش فيراري لأنها ما تجمل مع مطبات شوارع جده .. نقول همر ولونه أسود ومظلل كمان ... لقيتها شغاله وبابها مفتوح قدامك .. تسرقها ؟
كيف تطيح عليك الأمانه والشرف قدام الهمر .. لكن قدام أعراض الناس .. على الشرف السلام
ان شبابنا إلا من رحم ربي أصبح ضعيف لدرجة لو رأى مجرد عبايه ضيقة متمايله مستعد أن يضحي بكل مبادئه
اننا نحتاج الى مراجعة ووقفة مع النفس واعادة صياغة المناهج نحتاج إلى مزيداً من رجال هيئة الأمر بالمعروف والنهي عن المنكر نحتاج ان نسأل الله الهدايه
نحتاج ان نراقب الله في السر والعلن