قصائد قيلت في حب الوطن ..

[بنفسج]

اليوم الوطني ..


ما إن نسمع هذه الكلمة حتى يخالجنا شعور اعتزاز

شعور انتماء ،، لهذا الوطن المعطاء

وها نحن على أعتابه أود بل يود وطننا منا أن فرح به، ونتغنى معه

فلنُجب وطننا بمشاركاتنا ونشدو بقصائد قيلت فيه ..

[بنفسج]

ألبست شعــــري



البست شعري غتره وبشت وعقال
وخليت تغريب المذاهب لغيري

في ساحتي للفكر مليون مدهـال
وبحري بمكنوز المعَرفـه غزيـرِ


مافي عروقي غير الإسلام مثقـال
أموت واحيا بـه قليـل وْكثيـرِ


اعتـزّ بالاسـلام والعـمّ والخـال
وعلى العروبه والاصالـه أغيـر


آباءنا واجدادنـا ذبّـوا الجـال
والّلي يبي درب المراجل يسيـرِ


موروثنـا مجـدٍ وفخـرٍ ومنهـال
نبني عليـه ونستحـث المسيـرِ


ماني بمفتونٍ بصرعات الاجيـال
مع كـل صيـاحٍ نهـبّ ونطيـرِ


لي رايٍ امشي به ولي عزم رجّال
ولي لابـةٍ إذا بغيـت استشيـرِ


آل السعود الّلي لهم كل ماطـال
ماينزلـون إلا الطويـل العسيـرِ


آل السعود مطّوعـة كـل عيّـال
مايضربـون إلا بسيـفٍ شطـيـرِ


آل السّعود الّلي لهم فيْ وظـلال
وان شدّت الاّيـام غيـمٍ مطيـرِ



صاحب السمو الملكي الأمير / خالد الفيصل

يقول الأمير خالد الفيصل:


لاح يوم الوطن والعز لاح
وكلمة الله على البيرق تلوح

يوم الاسلام يا يوم الفلاح
والوطن كل روح له تروح

فوق الايمان ركبنا السلاح
والمقابيل بالخافق تبوح

الله اكبر مثل ضرب الرماح
سيلت في خفى الباغي جروح

[علي بن حمود]

منقول رائع بنفسج
دام لنا هذا الوطن شامخا بالإسلام


شكرا لك

قصيدة للشاعر البدر


قصيدة الأرض


انا من هالأرض .. أمي الصحراء .. احضنتني رمالها
وارتويت بطهرها .. أطعمتني تمرها .. وفرشت لي ظلالها
انا من هالأرض اللي مال عيالها .. غيرها أرض

***
عاشقٍ هالرمل .. من خلقني الله .. لين أموت
عاشقٍ جرد الروابي .. والفيافي والخبوت
عاشقٍ طين البيوت .. وفتلة خيوط الوبر
عاشقٍ مافي البشوت .. من عطا وطيب وفخر

***
حبيبتي .. ما أجملك ..
العشق لك .. والمجد لك ..
يكفي القصايد فخر .. لو توصلك ..
امد لك .. زهرة خزامى .. وامد لك غيمة تهامى
وفنجال .. من كف النشامى
يا مجدّله شعرك نفود .. وعالي جبينك هالنجود
وقلبك هضابٍ بينها .. أطهر مكانٍ في الوجود

***
قالوا : البيت الحرام .. قلت : ارضي
قالوا : الشرع الامام .. قلت : ارضي
قالوا : الحب السلام .. قلت : ارضي
قالوا : في مدحك نزود .. قلت : يفداها الحسود
ما على هالارض .. ارض مثل أرضي

[حـــذيفــة]

الله أحد.. وارضي بعد ..
ارضي تحت ظل الأسد ..
في يدنا كتاب الله .. وفي يدنا الحسام
إخوان من طاع الله .. في حرب وسلام
الله معك يا بلادي ..
حنا الوفا من طبعنا .. وعادتنا طيب وكرم
حكامنا من شعبنا .. هذا اخو وهذا ابن عم
حنا جسد فيه الأسد روح .. حنا بلد للخير نبني صروح
في يدنا كتاب الله .. وفي يدنا الحسام
إخوان من طاع الله في حرب وسلام
الله معك يا بلادي ..
لي ديرةٍ عالي السحاب .. يسكن في شم جبالها
اطهر ثرى .. وأغلى تراب .. تفخر بفعل رجالها
حنا جسد فيه الفهد روح .. حنا بلد للخير نبني صروح
في يدنا كتاب الله .. وفي يدنا الحسام
إخوان من طاع الله في حرب وسلام
الله معك يا بلادي ..

[وجدان]

مرحبا بالحرف في حب الوطن ... مرحبا واغلى تراحيب القصيد

يا بلاد في ذرا العليا سكن ... منبع للنور والمجد التليد

هو غلاك اللي كسب روحي رهن ... او دريت العمر في حبك يزيد

بانقش الشيله من حروفي لحن ... كان يكفي او تبي دم الوريد

في ترابك كم لهت كفي زمن ... ذكريات كنها لي يوم عيد

\
/
\

الشاعرة / نوال الراشد

[هطول]

الله الاول وعزك يا الوطن ثاني
لأهل الجزيرة سلام وللملك طاعه

حنا جنود الحرس للقايد الباني رمحه..
ودرعه وكف الشيخ وذراعه

مثل السيوف البواتر وان جنى الجاني
يضرب بها ارقاب من بالدار طماعه

من بان عبد العزيز وصبحنا باني
ما عاد نقبل ضلام الليل لوساعه

في السلم يشهد لنا عمر الاوطاني
وفي الحرب لارواحنا للموات بياعه

* ومن رائعة أخرى يقول الامير بدر بن عبد المحسن:

أرفع الراس يا الحر القطام واكثر الحمد.. للي صانها

انت فالمجد لك راس السنام وعزة الناس من اوطانها

انت الاول اللي سل الحسام وقالوا الخيل من فرسانها

الفخر لك ولا تسمع كلام لا يهمك حكي عدوانها

ديرتك من عشقها ما يلام ويغضب الله على من خانها* ومن قصيدة للأمير محمد الاحمد السديري:
ياللي لكم في منبر المجد محراب نلتوه من عقب الكدر والمصايب

نلتوا رفيع المجد بسيوف وحراب وعدوانكم شافوا كثير الغلايب

بحزم ولطم فيه تقطيع الارقاب وعزم جلاميد الصخر منه ذايب

وحرب مرير فيه تقتيل الاشناب يقلب شعر راس الولد منه شايب

يشهد لهم بالطيب من وسط الاصلاب والحي واللي حد رعوج النصايب

صفوة هل العوجا مهدين الاصعاب تارد حياض الموت ورد الجلايب