على شاطئ جده ...
على شاطئ بحر جده جلست اراجع اللي فات
جريح وداخلي سحابة حزن تكشف بوارقها
تذكرت الزمان اللي مضى ثم هلت العبرات
ليا من سالت العبرة ليا الاخرى تسابقها
هموم الوقت تلعبي وقمت اسطر الابيات
بيوت الشعر من هاجس ضميري قمت انسقها
اكافح واتامل واكتم الونه بوسط الذات
اجازف واتحدى الوقت واحداثه اسابقها
ولافكرت في القادم ومايخفيه من لوعات
مغامر في بحر حزن الزمان ونفسي اغرقها
بسكين الغدر وقتي طعني فالظهر طعنات
جريمه دورة الايام تكشف لي حقايقها
جبرني وقتي وطعته وعشت بعالم الحسرات
اشوفه قابض روحي بيدينه ويشنقها
رفعت الرايه البياء ابستسلم بكل اسكات
مدام الحظ في وجهي جميع ابوابه اغلقها
دخيلك يازماني حن خفف لوعتي لحظات
ابنسى اهموم في جوفي شراييني تمزقها
خطاياك اكثرت ياوقت عطني ربعها حسنات
كفايه ماجرالي صدمتك ماني مصدقها
اشوفك يازماني صرت قاسي خفف اللوعات
عليه حتى من فرحتي لاعاد تسرقها
خلاص اللي مضى لي فات اقفى بطوي الصفحات
مدام الغيمه اللي داخلي طاحت صواعقها
طموحي مابعد جيته ولكن الامل مامات
ابكمل رحلتي والنفس مرجعها لخالقها
ابسجد واطلب المولى الهي يدمح الزلات
يعوضني عن الماضي عسى احلامي يحققها
على الشاطي جلست ابكي الم واراجع اللي فات
ليا سالت دموع الحزن خديني تعانقها.
|
 |
رد مع اقتباس